„Enginn í fjölskyldunni hefur séð aðra eins einkunn“

Nemendur í Reykjanesbæ stóðu sig vel í samræmdum prófum sem þau tóku í haust og segir ungur nemandi í Myllubakkaskóla engan í sinni fjölskyldu hafa séð aðra eins einkunn og hann fékk út úr prófunum. Hann sló því fjölskyldumet.

Samræmdu prófn voru lögð fyrir 4., 7. og 10. bekk og stóðu nemendur í Myllubakkaskóla sig með glans. Má í því samhengi nefna að fjórðu bekkingar náðu 8,7 í meðaltalseinkunn í stærðfræði á meðan landsmeðaltalið var 6,8.

Eðvarð Þór Eðvarðsson skólastjóri segir mikla áherslu lagða á gott samstarf við foreldra. „Ef okkur tekst að festa foreldrasamstarfið algjörlega í sessi, með þetta starfslið og þessa frábæru nemendur, þá náum við að halda stöðugleika í útkomum og öðru sem snýr að velferð barnanna“, segir hann.

Þeir nemendur sem fréttastofa ræddi við í morgun sögðu það gaman að taka próf og að þeim hafi gengið vel. Hinn 9 ára gamli Guðjón Steinn Skúlason líkti próftöku við bikarmót í fótbolta þar sem að stressið sem leggst á hann hjálpar honum við að gera eins vel og hann getur. „Ég væri alveg til í að taka prófin aftur. Bara svona spóla aftur í tímann. Með DVD fjarstýringu, fattarðu?“ sagði hann og hló.

Guðjón er sáttur við útkomuna úr prófunum og segir engan í sinni fjölskyldu hafa séð annan eins árangur. „Fjölskyldan mín hefur aldrei þekkt neinn sem hefur fengið svona góða einkunn í samræmdum prófum, eða bara í neinu prófi sko“, sagði Guðjón stoltur í bragði.