"Auðvelt að stunda vörumerkjastuld"

Í síðustu viku fjölluðum við um að íslenskri hönnun væri í auknum mæli stolið og að stór erlend fyrirtæki hefðu jafnvel verið stofnuð í kringum slíka þjófnaði. „Það var auðvitað mjög sláandi þegar við lentum í þessu og bara eitthvað sem við hefðum aldrei getað ímyndað okkur, að hönnun sem hefði orðið til hér á Íslandi gæti orðið að fyritæki annars staðar,“ segir Guðfinna Mjöll Magnúsdóttir, vöruhönnuður og einn eigenda Víkur Prjónsdóttur. Stórt bandarískt fyrirtæki blómstrar nú í kringum sölu á hönnun fyrirtækisins, svokallaðri skegghúfu.

Eigendur Víkur Prjónsdóttur gátu rakið hvar hönnunarþjófarnir höfðu keypt vöru þeirra og höfðu samband við þá. „Þeir höfðu enga samvisku gagnvart þessu, þeim fannst þetta mjög eðlilegt,“ segir Guðfinna.

Fyrirtækið Ígló&Indí hefur orðið fyrir barðinu á óprúttnum þjófum sem græða á hönnun þess í gegnum netsíður í Asíu, þar sem nákvæmar eftirlíkingar eru seldar og jafnvel í nafni fyrirtækisins. Erfitt er að hönnunarverja hverja einustu flík og því leggja Ígló&Indí áherslu á að íslenskir hönnuðir verji sjálf vörumerkin.

„Með þeirri nútímavæðingu sem rafrænir miðlar eru, er gríðarlega auðvelt að stunda vörumerkjastuld og það sem við höfum lent í er að aðilar á Asíumarkaði hafa stolið markaðsefninu okkar,“ segir Guðrún Tinna Ólafsdóttir, framkvæmdastjóri Ígló&Indí.

Guðrún Tinna segir það hafa verið mikið áfall að uppgötva hönnunarstuld í fyrsta skipti og er nýjasta vandamálið að markaðsefni frá fyrirtækinu er stolið og það selt beint til þriðja aðila. „Við erum með samstarfsaðila á Íslandi og erlendis sem fylgjast með þessu og í öllum þessum tilvikum sem við höfum lent í þessu höfum við haft samband við þessa aðila úti í heimi og komið í veg fyrir að þeir haldi áfram þessum viðskiptaháttum. Það skiptir mestu máli,“ segir Guðrún Tinna.