Lýsa yfir vantrausti á umhverfisráðherra

Náttúruverndarsamtök Íslands hafa lýst yfir vantrausti á umhverfisráðherra, Sigurði Inga Jóhannssyni. Umhverfisráðherra sendi í gær frá sér yfirlýsingu þess efnis að lög um náttúruvernd verði afturkölluð.

Náttúruverndarsinar segja yfirlýsingu umhverfisráðherra til marks fjandsamlega afstöðu hans til náttúruverndar. „Hann hefur allt á hornum sér. Fyrst lýsti hann vilja sínum til að leggja niður umhverfisráðuneytið, því næst tók hann undir kröfu iðnaðarráðherra um að Norðlingaölduveita yrði byggð þvert á niðurstöður rammáætlunar og lög þar um og nú vill ráðherra rífa niður náttúruverndarlög sem voru nær fjögur ár í undirbúningi. Náttúruverndarsamtök Íslands lýsa yfir vantrausti á umhverfisráðherra,“ segir í tilkynningu frá Náttúruverndarsamtökum Íslands.

Samtökin benda á að í stefnuyfirlýsingu ríkisstjórnarinnar standi að hún muni „…vinna að því að Ísland verði í fararbroddi í umhverfismálum og öðrum þjóðum fyrirmynd á sviði umhverfisverndar.“ Þessi stefnulýsing hljómar nú sem öfugmæli að sögn Náttúruverndasamtaka Íslands.