Óvirk umferðarljós á höfuðborgarsvæðinu

Umferðarljós á stóru svæði á höfuðborgarsvæðinu duttu út um klukkan sex í dag vegna bilunar í stýribúnaði frá Landsneti.

Samkvæmt upplýsingum fréttastofu kom stór hnykkur á kerfið, sem olli truflunum víða. Meðal annars sló út rafmagn í aðalstöðvum Íslandsbanka á Kirkjusandi svo bankinn var keyrður áfram á vararafstöðvum.

Eiríkur Hjálmarsson, upplýsingafulltrúi Orkuveitu Reykjavíkur, segir að svo virðist sem þessi hnykkur, eða púls, hafi orsakað bilun í stýribúnaði umferðarljósanna.

„Samkvæmt okkar upplýsingum eru umferðarljósin að ræsa sig,“ segir Eiríkur.

Ekki náðist í forsvarsmenn Landsnets en á heimasíðu þeirra var sett inn eftirfarandi tilkynnining:

„Klukkan 17:57 var truflun í raforkukerfinu vegna útleysingar stóriðju SV-lands sem olli því að nokkuð mikil tíðnihækkun varð og vélar leystu út. Unnið er að uppbyggingu kerfinsins.“