Forrit sem fær kyrrsetufólk til að teygja á

Ágúst Ævar Guðbjörnsson er einn þriggja frumkvöðla sem standa á bak við vefsíðuna sitstretch.com. Einkaþjálfarinn Þórdís Filipsdóttir hannaði æfingar fyrir síðuna og fór hún ásamt Daníel Brandi Sigurgeirssyni með hugmyndina í frumkvöðlakeppnina Gulleggið. Þau ákváðu síðan ásamt Ágústi að gera hugmyndina að veruleika. „Á hverjum degi er fjöldi fólks sem situr mjög mikið, t.d. í vinnu eða á ferðalögum og við vildum búa til sérútbúnar æfingar sem fólk getur gert sitjandi, án þess að þær valdi truflun á deginum,“ segir Ágúst.

Hægt er að stilla forritið þannig að lítill gluggi opnist reglulega á tölvuskjánum og minni notandann á að gera teygjuæfingar sem taka stutta stund en einnig er hægt að opna forritið að vild og nálgast æfingar fyrir þau líkamssvæði sem þurfa á teygjum að halda. „Þetta getur meðal annars nýst fólki sem ferðast mikið og situr lengi í flugvélum, lestum og svo framvegis. Markhópurinn okkar er erlend fyrirtæki; við erum að reyna að stíla inn á stærri fyrirtæki erlendis, sem væru þá hugsanlega með 500 starfsmenn eða fleiri.“

Forritið kostar rúmar sex hundruð krónur og hægt er að sækja það fyrir Windows eða Mac. „Framtíðarsýn okkar er að fara yfir í netið, þannig að þetta sé ekki bundið við Mac eða Windows heldur sé hægt að nota þetta í hvaða tæki sem er,“ segir Ágúst að lokum.