Kamerún hafnar því að gera samkynhneigð löglega

Samkynhneigð er ólögleg í Kamerún og viðurlög við henni eru allt að fimm ára fangelsisvist. Ofsóknir gegn samkynhneigðum í landinu er einnig eitt það versta sem fyrirfinnst í heiminum.

Samkynhneigðum, og þá sérstaklega talsmönnum þeirra, er sífellt hótað og eiga þeir í hættu að vera áreittir, pyntaðir og myrtir.

Mannréttindaráð Sameinuðu þjóðanna lagði til við stjórnvöld í Kamerún að gera samkynhneigð leyfilega í landinu og berjast gegn því ofbeldi og mismunun sem samkynhneigðir búa við í landinu.

Stjórnvöld í Kamerún höfnuðu þessum tillögum.

Eftir þær fregnir hefur alþjóðlegur þrýstingur aukist og samtökin All in, sem berjast fyrir réttindum samkynhneigðra, standa nú fyrir undirskriftasöfnun á netinu.  Þar er skorað á forseta landsins og stjórnmálamenn að stöðva ofbeldi gegn samkynhneigðum, að gera samkynhneigð löglega í landinu og að frelsa þá fjölmörgu sem eru í fangelsi vegna kynhneigðar.  

Samtökin stefna á hundrað þúsund undirskriftir og ætla að senda skjalið til stjórnvalda í Kamerún um leið og markmiðinu er náð.