Óli Geir um KMF: „Gekk eins og smurð vél í gær“

Tónlistarhátíðin Keflavík Music festival heldur áfram í kvöld. Tónleikahaldarar voru ánægðir með gærkvöldið og eru bjartsýnir fyrir kvöldinu í kvöld þrátt fyrir hnökra á fimmtudaginn.

Óli Geir, einn tónleikahaldara, var hæstánægður með gærkvöldið og sagði stemninguna hafa verið góða. „Það gekk bara allt eins og smurð vél og þetta var bara geðveikt. Gestir voru mjög ánægðir og stóru atriðin sem voru í Reykjaneshöllinni slógu í gegn."

Sagði Óli Geir í útvarpsviðtali í hádegisfréttum Bylgjunnar í dag. Ekki stendur til að bregða út af dagskrá hátíðarinnar. „Dagskráin heldur áfram í kvöld og við náttúrulega bara klárum hátíðina með stæl. Stærstu nöfnin okkar í kvöld eru Tinie Tempah og Chase & Status, þau eru akkurat að koma til landsins. Svo er náttúrulega Valdimar og allt þetta Íslenska, Steed Lord og fleiri. Þetta verður allt í tjöldunum okkar niðri í bæ og í Reykjaneshöllinni."

Óli segir að ekki hafi verið frekari eftirmálar vegna vandræðana sem komu upp á fimmtudeginum, en þó hafi verið ákveðið að lækka miðaverð. „Nei nei, ekkert þannig. Allt mótlætið sem fór af stað vara bara einhver bolti sem byrjaði að rúlla og við gátum ekki stoppað. Það eru náttúrulega til tvær hliðar á öllu, en við erum búin að fá ótrúlegan stuðning þrátt fyrir mótlætið og þetta er bara búið að ganga rosalega vel. Við höfum samt ákveðið að bomba miðaverðinu niður og taka svona sérstakt laugardagskvöld með öllum þessum atriðum og selja bara inn á stakt kvöld með ódýrari miða."

Óli Geir segist bjartsýnn fyrir völdinu í kvöld. „Það verður alveg geggjað. Það voru mörg þúsund manns í Reykjaneshöllinni í gær og showið þar er mjög flott og ég held það verði bara ennþá fleiri sem mæta í kvöld."