Helgi Hjörvar: Fjarvera Bjarna hrópandi

Helgi Hjörvar, þingmaður Samfylkingarinnar, gagnrýndi Sigmund Davíð Gunnlaugsson forsætisráðherra harðlega í umræðum á Alþingi í dag. Hann sagði munnlega skýrslu forsætisráðherrans um aðgerðir vegna skuldavanda heimilanna vera það ómerkilega að ráðherrar Sjálfstæðisflokksins hafi ekki nennt að hlusta á hana.

„Ég fagnaði því að hæstvirtur forsætisráðherra bauðst til þess að koma hér til þings og gera grein fyrir stöðunni í skuldamálunum vegna þess að það þyrfti að eyða óvissu fyrir tugþúsundir heimila í landinu og íslenskt efnahagslíf. En svo kemur hæstvirtur forsetisráðherra hingað á Alþingi Íslendinga og segir ekki neitt. Skýrsla hans er svo ómerkileg að ráðherrar Sjálfstæðisflokksins nenntu ekki að sitja undir henni hér á ráðherrabekkjum heldur fóru úr salnum,“ segir Helgi og bætir við.

„Formaður Sjálfstæðisflokksins, Bjarni Benediktsson, yfirgaf húsið klukkan hálf tólf og er ekki viðstaddur umræðuna. Fjarvera formanns Sjálfstæðisflokksins við þessa umræðu er auðvitað hrópandi.“

Óheilindi forsætisráðherra um stimpilgjaldsloforðið sláandi

Helgi gefur lítið fyrir efndir forsætisráðherra um afnám stimpilgjalda. „Óheilindi forsætisráðherra um stimpilgjaldsloforðið eru sláandi. Hann sagði hér að búið væri leggja fram frumvarp um afnám stimpilgjalda. Ég hvet fjölmiðla til að kynna sér hvers konar efndir það voru. Þar eru stimiplgjöld afnumin af lánsamningum en sett í staðinn á kaupsamninga og afsöl. Ungt fólk sem er að fara að kaupa sér íbúð í fyrsta sinn þarf að borga meiri stimpilgjöld heldur en fyrir breytinguna.“

Helgi segir að nóg sé að lesa grein Sigríðar Andersen, varaþingmanns Sjálfstæðisflokksins, til að fá átta sig á því að ekki væri verið að fella niður stimpilgjöld heldur einfaldlega að færa þau til.