ESB smalar hælisleitendum

Nokkrum albönskum fjölskyldum hefur verið vísað úr landi og verða fluttar af landi brott í kvöld. Farþegaflugvél á vegum landamærastofnunar Evrópusambandsins, (Frontex), kemur til landsins og sækir fólkið sem allt hefur sótt um hæli hér á landi.

Flugvélin hefur viðkomu í fleiri löndum í sama tilgangi, og flytur alls um 160 albanska hælisleitendur til heimalandsins. Viðkomustaðirnir eru meðal annars í Svíþjóð þangað sem vélin flýgur í nótt og í Róm á Ítalíu, að því er Fréttablaðið kemst næst.

Um sautján Albana er að ræða, þar af sex börn. Eitt þeirra er fimm mánaða gamalt sem fæddist hér á landi. Ein konan í hópnum er komin sex mánuði á leið og orðin veik vegna álags, herma heimildir Fréttablaðsins. Jafnframt er gagnrýnt að aðeins líða um tveir sólarhringar frá því fólkinu var tilkynnt um að komið væri að brottför og þangað til þau verða flutt um borð í flugvélina.

Einu upplýsingarnar sem fengust frá embætti ríkislögreglustjóra voru að innanríkisráðuneytið hafi falið embættinu að skipuleggja og annast heimferð sautján albanskra ríkisborgara sem Útlendingastofnun hefur synjað um hæli og frávísað. Um tilurð þess að vél á vegum Frontex fer um Evrópu við að sækja albanska hælisleitendur segir í svarinu að „Ísland er aðili að Frontex og tekur þátt í ýmsu samstarfi á grundvelli þess og í samræmi við reglur ESB (Return Directive).





Saga Ýrr Jónsdóttir, lögmaður hjá Vox lögmannsstofu, segir að hluti hópsins hafi farið fram á frestun réttaráhrifa á úrskurði innanríkisráðuneytisins um frávísun en þeirri beiðni var hafnað. En almennt er frestun réttaráhrifa ekki samþykkt á meðan beðið er eftir niðurstöðu dómstóla.

Hluti af hópnum kom hingað til lands fyrir landsleik Íslands og Albaníu í september, en eins og greint var frá á þeim tíma skiluðu þrettán þeirra sér ekki í flug að leik loknum.

Á þeim tíma greindi Útlendingastofnun frá því að 36 Albanir höfðu sótt um hæli á Íslandi á þessu ári eða þrefalt fleiri en árið á undan.

Albanar eru næstfjölmennasti hópurinn sem sótt hefur um hæli á þessu ári en aðeins Króatar eru fleiri. Öllum umsóknum hælisleitenda frá Albaníu hefur verið hafnað.

Erfitt er að fá upplýsingar um á hvaða grundvelli Albanir óska eftir hæli á Íslandi. Heimildir Fréttablaðsins greina að flestir nefni að þeir séu á flótta undan blóðhefnd í heimalandinu sem byggir á aldagömlum albönskum lögum - Kanun lögum. Staðfest er að það á við um tvær fjölskyldur sem fara af landi brott í kvöld. Erfitt getur verið fyrir yfirvöld að sannreyna frásagnir um hvort verið er að flýja blóðhefnd.

Lögin útlista meðal annars hvernig standa má að blóðhefndinni. Drepa má samkvæmt lögunum karlmenn á öllum aldri. Þar sem ekki má framfylgja lögunum á heimili viðkomandi eru þess dæmi að drengir og ungir karlar hafi aldrei farið út af heimilinu.

Flestir flýja blóðhefnd

• Erfitt er að fá upplýsingar um á hvaða grundvelli Albanar óska eftir hæli á Íslandi. – Heimildir Fréttablaðsins greina að flestir nefni að þeir séu á flótta undan blóðhefnd í heimalandinu sem byggist á aldagömlum albönskum lögum – Kanun-lögum.
  
   
• Staðfest er að það á við um tvær fjölskyldur sem fara af landi brott í kvöld. 
  
  
• Erfitt getur verið fyrir yfirvöld að sannreyna frásagnir um hvort verið er að flýja blóðhefnd.
  
  
• Lögin útlista meðal annars hvernig standa má að blóðhefndinni. Drepa má samkvæmt lögunum karlmenn á öllum aldri. Þar sem ekki má framfylgja lögunum á heimili viðkomandi eru þess dæmi að drengir og unglingar hafi aldrei farið út af heimilinu.