Bjargað úr sjónum

Bifreið lenti utan vegar við Drottningarbraut á Akureyri í morgun, og hafnaði út í sjó. 

Er lögreglumenn komu á vettvang var ökumaður ennþá inni í bifreiðinni og var með sjó upp á mitti.

Vegfarendur höfðu vaðið út í sjóinn til að huga að ökumanninum sem var með meðvitund en illa áttaður. Af ótta við að bifreiðin myndi fljóta lengra út höfðu nokkrir vegfarendur bundið spotta í bifreiðina og í aðra bifreið í landi.

Lögreglumenn náðu að komast inn í bifreiðina og náðu að losa ökumann og var hann svo borinn í land eftir að búið var að ganga úr skugga um að hann væri ekki mikið slasaður.

Hann var síðan fluttur á fjórðungssjúkrahúsið á Akureyri, en hann er ekki mikið slasaður.