Viðar Örn skoraði tvö í sigri Fylkis

Selfyssingurinn Viðar Örn Kjartansson byrjar vel hjá Fylki en hann skoraði tvívegis í 3-2 sigri liðsins á Grindavík í Lengjubikarnum í kvöld.

Viðar Örn, sem samdi nýverið við Árbæjarliðið, kom Fylki yfir á 22. mínútu en Óli Baldur Bjarnason jafnaði metin fyrir Grindavík áður en flautað var til hálfleiks.

Viðar Örn endurheimti forystuna fyrir Árbæinga í uupphafi síðari hálfleiks og Ásgeir Örn Arnþórsson bætti þriðja markinu við á 57. mínútu. Jordan Edridge klóraði í bakkann á 89. mínútu fyrir Grindvíkinga.

Fylkir vann FH á sunnudagskvöldið og er nú efst í 1. riðli með níu stig eftir fjóra leiki. Grindavík er í fjórða sæti með fjögur stig eftir þrjá leiki.