Austfjarðaþokan seld ferðamönnum

„Við ætlum að kynna þokuna fyrir Íslendingum og útlendingum,“ segir Ívar Ingimarsson, einn þriggja manna sem nú kynna hugmynd um þokusetur á Stöðvarfirði.

„Hér á Austurlandi þurfum við að leita að sérstöðu. Við eigum Austfjarðaþokuna og hún er náttúrufyrirbrigði eins og norðurljósin. Fyrir nokkrum árum voru menn taldir galnir þegar þeir ætluðu að selja útlendingum norðurljósin. Það hefur heldur betur sýnt sig hver var galinn þar,“ segir Ívar.

Áform félaganna þriggja, sem allir eru að austan og búa þar, voru kynnt fyrir yfirvöldum í Fjarðabyggð. „Þar var mjög vel tekið í erindi okkar og ég reikna með að við förum á fullt að afla okkur aðila til að vinna með okkur í þessu eftir áramótin,“ segir Ívar. Þá hafi þeir félagar fengið 600 þúsund króna styrk frá Vaxtarsamningi Austurlands. Viðbrögð fyrirtækja á svæðinu um að koma að verkefninu hafi líka verið jákvæð.

„Það er klárt mál að Austurlandið er svolítið út undan þegar kemur að ferðamálum og afþreyingu og við höfum áhuga á að koma að verkefnum sem geta nýst svæðinu. Þess vegna viljum við taka þátt í að kynna hvað Austurland hefur upp á að bjóða sem valkost fyrir bæði Íslendinga og útlendinga.“

Líkt og gerist með norðurljósin er ekki hægt að ganga að þokunni vísri. „Við erum í samstarfi við Veðurstofuna. Trausti Jónsson ætlar að vera okkar sérfræðingur þar um hvenær best er að sjá og upplifa þokuna,“ segir Ívar.

Bjóða á upp á margvíslegt efni til skemmtunar og fróðleiks í þokusetrinu. „Hér er fullt af stöðum sem tengjast þoku. Gömlu karlarnir á árabátum hér úti og fólk á fjöllum var að villast í þokunni og bjargast,“ bendir Ívar á.

Þá segir Ívar að gera megi sérstaka „þokustíga“ upp frá vegum þar sem fólk getur stöðvað bíla sína og gengið upp úr þokunni. Á vissum stöðum verði vefmyndavélar sem hægt sé að tengjast og aðgæta hvernig útlitið er efra.

„Ferðamenn segjast stundum ekki ætla niður á firði vegna þess að þar sé þoka. Eitt af því flottasta sem menn geta upplifað er að sjá þokuna koma og vefja sig um fjallatoppana eða skríða inn fjörðinn öðrum megin en vera sjálfir í heiðríkju hinum megin,“ segir Ívar sem sjálfur er frá Stöðvarfirði og rekur gistihús á Egilsstöðum.