Ríkisborgararéttur í USA fyrir 60 milljónir

Nú klukkan fimm hefst fundur á Grand Hótel en þar um Pétur Sigurðsson fasteignasali fjalla um skilvirka leið sem gengur út á að öðlast bandarískan ríkisborgararétt. Pétur var í ýtarlegu viðtali í Bítinu í morgun og sagði af því hvernig menn geta, með því að fjárfesta í Bandaríkjunum fyrir 60 milljónir íslenskra króna, í tilteknum verkefnum sem eru atvinnuskapandi öðlast í framhaldinu bandarískan ríkisborgararétt. Vísir heyrði í Pétri nú skömmu fyrir fundinn. Hann segir gjaldeyrishöft enga fyrirstöðu því ef menn ætli að flytja af landi brott megi þeir taka með sér það sem þeir eiga. „Samkvæmt reglugerð númer 800, Seðlabankans um gjaldeyrishöft, ef minnið svíkur mig ekki,“ segir Pétur.

Hann segist þekkja nokkur dæmi um að menn hafi nýtt sér þessa leið. En gerir sér ekki grein fyrir því hvort fundurinn á eftir verði vel sóttur. Hann skynjar mikinn áhuga en á móti komi að um talsvert mikla fjárfestingu er að ræða og ekki víst að margir Íslendingar ráði við það, þó þeir glaðir vildu yfirgefa Ísland og setjast að í Bandaríkjunum.

Pétur veit til þess að bandaríska sendiráðið hefur á honum gætur og hefur verðið að spyrjast fyrir um hann án þess þó að hringja í sig. „Ég á von á þeim á fundinn og það verður gaman að hitta þá aðila. Hvers vegna? Ætli þeim hafi ekki fundist ég tala full frjálslega á Bylgjunni í morgun, um þessi atriði.“

Pétur er fasteignasali og starfar í Bandaríkjunum, hefur starfað þar nú í 15 og hálft ár. Hann er með tvöfaldan ríkisborgararétt, íslenskan og bandarískan sem hann öðlaðist í gegnum konu sína, sem fædd er í Bandaríkjunum.