Árni Sigfússon liggur undir feldi

Árni Sigfússon, bæjarstjóri og oddviti meirihluta Sjálfstæðismanna í bæjarstjórn Reykjanesbæjar, ætlar að greina frá því um áramót hvort hann ætli að gefa kost á sér áfram. Árni kom til Reykjanesbæjar árið 2000 og hefur verið oddviti og bæjarstjóri í bráðum þrjú kjörtímabil. Þetta kemur fram á vef Víkurfrétta.

Að því er fram kemur á vef Víkurfrétta er þrýst á Árna um halda áfram og klára eitt kjörtímabil í viðbót. Flestir bæjarfulltrúar Sjálfstæðisflokksins hafa hug á að bjóða fram krafta sína áfram þó þeir hafi ekki allir ákveðið sig endanlega.

Nefnd á vegum Sjálfstæðisflokksins hefur að undanförnu rætt við bæjarfulltrúa. Á fundi fulltrúaráðs 16. janúar næstkomandi verður lagt fyrir fundinn hvort stilla eigi upp lista eða efna til prófkjörs. Gefi Árni kost á sér áfram og flestir núverandi bæjarfulltrúar er jafnvel talið líklegt að stillt yrði upp á lista, að því er segir á vef Víkurfrétta.