Óþefur af Vísindabók Villa

Sögum fer af því að fólk hafi þurft að leggja frá sér metsölubók Vilhelms Antons Jónssonar því svo mikill óþefur gýs upp þegar hún er lesin.

Fólk á vefsvæðinu Bland veltir þessu fyrir sér og þar segir meðal annars: „Gaf syninum Vísindabók Villa í jólagjöf, frábær bók og fullt af skemmtilegu .... en lyktin af / úr bókinni er svo hræðileg að við urðum að hætta að skoða hana saman fyrir svefninn. Hehehe hvað er málið með það... einhver annar með þessa bók sem finnur svona skrýtna lykt af henni?“

Og, jú... fjölmargir kannast við þessa reynslu. Vísir hefur heimildir fyrir því að í einu tilfelli hafi fólk hreinlega þurft að leggja bókina frá sér; því súrnaði í augum. Og svo enn sé vitnað í bland.is: „Jebb, strákurinn segir að þetta sé „extreme new book smell“ og kötturinn hljóp í burtu í ofboði.“

Líkast til hæfir það efninu að lykt skuli leggja af bókinni. Vísindabók Villa gekk vonum framar í jólabókaflóðinu og var 3. hæst á sölulistum síðustu vikuna fyrir jól, kom á hæla bók Arnaldar Indriðasonar og Yrsu Sigurðardóttur. Bókin er uppseld hjá útgefanda, Forlaginu, sem lét prenta bókina í 15 þúsund eintaka. Má Villi vel við una og hinn ungi höfundur hefur brugðist við fregnum af óþef þeim sem leggur af bókinni og sendi frá sér, í gegnum Facebooksíðu sína, skilaboð til þeirra sem velta vöngum yfir þessu á bland.is, svohljóðandi:

„Gætuð þið komið þessu til skila: pappírinn heitir Munchen og er hnausþykkur og vandaður. Enda valdi eg hann. Það er svona lykt af honum þegar hann er nyr. Mer finnst hun frabær. Enda fokdyr pappir  en ja. Það er vandlifað. Bæði pappirinn og farvinn sem er settur a hann eru ætir.“