„Við erum vön þessu“

Búið er að lýsa yfir hættustigi vegna snjóflóðahættu á Hnífsdal sem og á Ísafirði. Bæirnir Hraun í Hnífsdal og Geirastaðir í Syðridal við Bolungarvík hafa verið rýmdir. Einnig var reitur 9 rýmdur, en Þar er þó engin búseta heldur eingöngu atvinnuhúsnæði. 

Hulda Helgadóttir og Hjálmar Sigurðsson íbúar á Hrauni á Hnífsdal fóru af heimili sínu í gærkvöldi eftir að tilskipun um rýmingju var gefinu út. „Við þurftum að fara og erum komin til sonar okkar sem býr á Hnífsdal, þannig að við erum í góðum málum,“ segir Hulda.

Síðustu jól var heimili þeirra einnig rýmt. „Það var á svipuðum tíma og þá vorum við í fjórar nætur hjá syni okkar. Við erum vön þessu, en það er ekki skemmtilegt að standa í þessu. Við höfum nú oft séð verra veður en núna. Það er ekki orðið svo slæmt ennþá.“

Þau Hulda og Hjálmar búa í íbúðarhúsi á Hrauni frá árinu 1980, en gamli bærinn varð fyrir snjóflóði fyrir nokkrum árum. „Við viljum búa á Hrauni og við verðum því að sætta okkur við þetta. Eftir snjóflóðin í Súðavík og á Flateyri var farið í að endurmeta áhættusvæði og við sett á rautt svæði. Svo var það rétt hjá þeim, því árið 2005 féll snjóflóð og þá fór það yfir gamla bæinn. Þannig að við vitum af þessari hættu og eftir þetta getur maður ekki sagt neitt. Ef almannavarnarnefnd segir að nú sé hætta verðum við að hlýða því.“

Nú eru allir innilokaðir hérna, þar sem búið er að loka veginum til Ísafjarðar. „Maður kemst ekki til vinnu eða neitt. Það er ekki búið að opna Eyrarhlíð. Það eru allir innilokaðir að meðan.“ Aðspurð hvort rafmagnið hafi ekki haldist inni segir hún: „Jú, það hefur haldist sem betur fer. Í fyrra var það alltaf að fara og það var mjög óþægilegt. Það er gott að hafa rafmagnið, þá er allt í góðu lagi.“