Fagnaði aldarafmæli þann 11.12.13

Hún er fædd 11.12.13. Það var fyrir heilli öld og í dag fagnaði Guðrún Valborg Finnbogadóttir aftur afmæli sínu á þessari merkilegu dagsetningu.

„Ég er fædd á fimmtudegi klukkan ellefu fyrir hádegi 1913. Ég var að vona að afmælisdagurinn myndi hittast á það aftur að vera á fimmtudegi en það færðist svolítið,“ segir afmælisbarnið Guðrún Valborg.

Hún var hress og kát þegar fréttastofa leit við á heimili hennar að Droplaugastöðum í miðborg Reykjavíkur í dag. Tilefnið var ærið enda fagnaði Guðrún aldarafmæli sínu í dag. Hún er fædd 11. desember árið 1913 eða 11.12.13. Sú dagsetning rann upp að nýju í dag.

„Þegar ég var að borða áðan, þá kom glansandi sólskin inn á borðið, yfir matinn og mig þar sem ég sat. Ég kallaði á vinkonu mína og sagði að það vissu fleiri að ég ætti afmæli í dag,“ bætir Guðrún Valborg við.

Nánast í heila öld á Njálsgötu

Guðrún er mikið borgarbarn og hefur búið í miðborginni allt sitt líf. Árið 1918 fluttist hún í íbúð að Njálsgötu 27 og fluttist þaðan fyrir örfáum árum yfir á hjúkrunarheimili. Fimm ættliðir í fjölskyldu Guðrúnar hafa búið í þessu húsi og býr barnabarn hennar í íbúðinni í dag ásamt fjölskyldu sinni.

„Þarna var gaman að vera í gamla daga. Þá voru engir bílar á götunni. Þetta var bara hestvagnar og hestar,“ segir Guðrún.

Það var mikill gestagangur hjá Guðrúnu í dag og lék Embla Mýrdal, barnabarnabarn Guðrúnar, á flautu fyrir langömmu sína. Og Guðbún Valborg er enn í fínu formi þrátt fyrir að árin séu orðin 100.

„Ég held að ég hafi haft góða lund, létta frekar. Þótti gaman af eitthverri vitleysu,“ sagði hin aldargamla Guðrún að lokum.