Konur að flýja Ísland

Samkvæmt nýju nefndaráliti utanríkisnefndar virðist ískyggileg vá steðja að Íslendingum sem og Færeyingum og Grænlendingum en fyrir liggur að fækkun kvenna á Vestur-Norðurlöndum er veruleg. Nefndin leggur til að tekið verði upp samstarf við granna okkar um að kanna hvernig þetta megi vera?

„Þær eru að flýja. Farðu út á landi og þá skilurðu þetta. Atvinnutækifæri kvenna eru miklu minni úti á landi en í þéttbýli. Og sama máli gegnir þá um Ísland gagnvart þéttbýlli svæðum,“ segir Vilhjálmur Bjarnason, sem situr í utanríkisnefnd.

„Með tillögunni er lagt til að Alþingi skori á ríkisstjórnina að efna til samstarfs við stjórnvöld Færeyja og Grænlands um gerð samantektar yfir kannanir og rannsóknir sem lúta að orsökum þess að konum fækkar hlutfallslega meira en körlum meðal íbúa Vestur-Norðurlanda. Teknar verði saman niðurstöður slíkra rannsókna og kannana en einnig lagðar fram tillögur og stefnumörkun sem miðar að því að snúa þessari þróun við,“ segir í nefndaráliti.

Ef farið er inn á vef Hagstofunnar má sjá að konur eru fleiri en karlar í Reykjavík, Kópavogi og Garðabæ ... þéttbýlli svæðum en þær eru umtalsvert færri úti á landi. Og á Íslandi öllu eru nú færri konur en karlar. Fæðingartíðni er svipuð, ívið færri stúlkubörn fæðast en dánartíðni er meiri meðal sveinbarna og það jafnar sig út. Þá lifa konur lengur þannig að ef allt væri eðlilegt ættu þær að vera ívið fleiri, ef eitthvað er. Svo er þó ekki; konur eru færri en karlar. Munar þar þúsund. Vilhjálmur rekur þetta til þess að atvinnutækifæri eru minni fyrir konur þar sem dreifðari byggðir eru. Og líkt og það á við um dreifbýli á Íslandi gagnvart þéttbýli, á það við um Ísland gagnvart umheiminum. „Þetta sló mig, þegar ég fékk þetta í hendur og fór þá að skoða þetta nánar. Þetta undirliggjandi ójafnvægi. Það er búið að rannsaka þetta og í Færeyjum hafa konur flutt burt, á Grænlandi líka og hér einnig. Konur koma síður heim frá námi. Og það hallar á ógæfuhliðina með þetta,“ segir Vilhjálmur.

En, allt þetta vill utanríkisnefnd rannsaka betur og athuga hvort ekki finnist leiðir til að snúa þessari óheillaþróun við.