Arnþrúður íhugar alvarlega að sækja um útvarpsstjórastöðuna

Ingvi Hrafn Óskarsson, formaður stjórnar RÚV ofh, sagði að þess væri ekki langt að bíða að staða útvarpsstjóra yrði auglýst laus til umsóknar. Arnþrúður Karlsdóttir, útvarpsstjóri og eigandi Útvarps Sögu, sækir að öllum líkindum um starfi.

Eða, ætlar þú ekki örugglega að sækja um?

„Þetta er gríðarlega leiðandi spurning. Ég er að hugsa málið. Eigum við ekki að segja það? Ég hef verið beðin um að hugsa það mjög alvarlega,“ segir Arnþrúður og tekur vel í þennan möguleika: „Þetta ber nú allt svo brátt að. Maður er að lesa í umhverfið og hvernig þetta allt lítur út og hvort það er einhver sem er fyrirfram ákveðinn sem ég held að sé nú ekki. Þarf að skoða mínar aðstæður.“

Víst er að erfitt yrði að líta framhjá Arnþrúði ef hún sækir um. Hún hefur einna mesta reynslu af útvarpsmálum allra Íslendinga. Hún hefur nú átt og rekið Útvarp Sögu í tíu ár. „Alltaf á sömu kennitölunni,“ segir Arnþrúður sem er lærð sem blaða- og fréttamaður frá Blaðamannaháskólanum í Osló, útskrifuð þaðan. Og er einnig með próf í heimsspeki og fjölmiðlafræði frá Noregi. „Á þessum tíma starfaði ég fyrir íslenska sjónvarpið í Noregi og vann líka fyrir NRK." Þá var Arnþrúður bæjarfulltrúi, vel að merkja, fyrir Framsóknarflokkinn í Hafnarfirði og sat um stund á þingi.

„Já, fljótt á litið hlýtur það að vera að ég sé reynslumest. Í það minnsta ef litið er til kvenna. Mér er reyndar afskaplega illa við kynjakvóta. Og mér finnst niðurlægjandi að konur eigi að fá einhverja forgjöf, fyrir okkur konur sem höfum verið í atvinnulífinu og þorað að taka áhættu með tvær hendur tómar. Við stöndum í fæturna og þá er það niðurlægjandi þegar konur eru að fá stöður á silfurfati. Og einhverjir aðrir búnir að tryggja fjármagnið. En, ég byrjaði á Ríkisútvarpinu, á gömlu Gufunni, fyrir yfir 30 árum. Svo var ég á Rás 2 þegar hún byrjaði,  var ég á tíma fréttastjóri Bylgjunnar fjótlega eftir að hún byrjaði. Þá vissi nú enginn hvort sú stöð yrði í loftinu. En Bylgjan er búin að sanna sig í dag.“