Seinni vinningshafinn kominn fram - keypti miða fyrir tilviljun

Seinni vinningshafi stærsta Lottópotts Íslandssögunnar er kominn fram. Í tilkynningu frá Íslenskri Getspá segir að vinningshafinn sé atvinnulaus fjölskyldukona sem búi á höfuðborgarsvæðinu. Hinn vinningshafinn kom fram í fyrradag.

„Það var fyrir tilviljun að hún kom við á Select á Bústaðavegi, hún var að koma úr Vesturbænum og var alveg við það að verða bensínlaus.  Afgreiðslumaðurinn var sérstaklega elskulegur og þjónustulundaður og bauð henni að kaupa lottómiða, sem hún þáði.  10 raða sjálfvalsseðil sem kostar 1300 krónur.“

Konan skoðaði miðann ekki fyrr en eftir hádegi í dag, þegar hún heyrði að seinni vinningsmiðinn hafi verið keyptur á Select á Bústaðavegi. „Þegar í ljós kom að þetta var vinningsmiðinn titraði konan og skalf.  Hún setti miðann í veskið og  skellti sér í sturtu og tók veskið með sér inn á baðherbergið því að allt í einu þorði hún ekki að líta af því, samt var hún búin að þvælast með það út um allt og 70 milljón króna lottómiða í veskinu án þess að hún hefði hugmynd um það,“ segir í tilkynningunni.

Þegar konan sótti vinninginn í Íslenskri Getspá var hún ekki búin að segja eiginmanni sínum þessi gleðitíðindi, þar sem hún vildi fullvissa sig um að þetta væri raunveruleikinn og hún hefði í raun 70 milljóna króna miða í höndunum.

„Það er sannkölluð draumastaða að vera í þeirri aðstöðu að fá að segja maka sínum svona gleðitíðindi. Við óskum vinningshafanum innilega til hamingju með þennan frábæra glaðning.“