ASÍ skorar á fyrirtæki

Gylfi Arnbjörnsson, forseti ASÍ, birti pistil á vef ASÍ í dag. Þar fer Gylfi hörðum orðum um auglýsingaherferð Samtaka Atvinnulífsins og kallar hana áróðurskennda. Biðlar hann til fyrirtækja og opinberra aðila að sýna launafólki að þau séu tilbúin að axla ábyrgð með því að halda aftur af verðhækkunum á næstu mánuðum.

Segir hann SA hafa skautað framhjá þeirri „augljósu staðreynd“ að á Íslandi hafi veikur gjaldmiðill verið nýttur til að leiðrétta mistök í hagstjórn með því að láta hana falla reglulega með tilheyrandi tjóni fyrir launafólk í landinu. „Það er eins og SA hafi gleymt hruni krónunnar fyrir fimm árum,“ segir Gylfi.

Hann segir það skipta miklu máli fyrir umræðuna að halda því til haga að ef fyrirtækin í landinu hefðu fylgt markmiðum kjarasamninga síðasta áratugar hefði þróunin vafalaust orðið önnur.

„Ef atvinnurekendur beygðu sig undir aga þeirra kjarasamninga sem þeir gera þá er öruggt að verðbólga af völdum launahækkana, sem þeir básúna svo mjög, yrði sáralítil. Gott dæmi um þetta er að almenn launahækkun á þessu ári var 3,25% í febrúar en launavísitalan hefur hækkað um 6% sl. 12 mánuði.“

Gylfi segir að í aðdraganda komandi kjarasamninga hafi mikið verið rætt um mikilvægi þess að fyrirbyggja áframhaldandi háa verðbólgu. „Í því samhengi er ekki síður mikilvægt að fyrirtæki og opinberir aðilar sýni launafólki að þau séu sjálf tilbúin til að axla ábyrgð á slíkri leið með því að halda aftur af verðhækkunum á næstu mánuðum. Þannig má tryggja stöðugleika og kaupmáttaraukningu á lægra stigi launabreytinga sem gagnast öllum.“

Segir hann Reykjavíkurborg hafa gengið á undan með góðu fordæmi eftir að verkalýðsfélögin í höfuðborginni hafi mótmælt boðuðum breytingum og afturkallað boðaðar gjaldskrárhækkanir. „Nú hafa fleiri sveitarfélög fylgt í kjölfarið m.a. eftir hvatningar frá aðildarfélögum ASÍ.“

Ennfremur segir Gylfi það hafa vakið furðu að fjármálaráðherra skyldi neita að endurskoða boðaðar hækkanir í fjárlögum, sem sjálfur hafi skorað á Reykjavíkurborg.

Gylfi segir þá þögn sem ríki um áform forsvarsmanna fyrirtækjanna í landinu sé farin að vera mjög hávaðasöm. „Það er mín skoðun að mjög mikilvægt sé að fá þessa aðila að borðinu með beinum hætti. Því áformar ASÍ að skora á fyrirtæki og opinbera aðila að sýna þessu verkefni samstöðu og undirrita yfirlýsingu um þátttöku sína í átaki um verðstöðugleika.“

„Yfirlýsingarnar yrðu svo birtar inn á síðunni www.vertuaverdi.is. Þannig gætu þau með áberandi hætti sýnt hverjir axla ábyrgð og hverjir ekki.“