Tvö efstu gefa ekki kost á sér áfram

Hvorki Guðríður Arnardóttir, oddviti Samfylkingarinnar í Kópavogi, né Hafsteinn Karlsson, sem skipar annað sætið á lista flokksins munu gefa kost á sér fyrir næstu sveitarstjórnarkosningar.

Þetta var tilkynnt á félagsfundi Samfylkingarinnar í Kópavogi sem fram fór í Hamraborg í kvöld og Kópavogsfréttir greina frá.

Guðríður hefur leitt lista Samfylkingarinnar í Kópavogi frá árinu 2006. Hún var formaður bæjarráðs frá 2010 til 2012. Á fundinum í kvöld sagði Guðríður að tíminn væri nú réttur hjá sér að hætta í stjórnmálum í bili.

Hafsteinn Karlsson hefur verið í framboði fyrir Samfylkinguna frá árinu 1998 en hefur lengi haft hug á að draga sig úr stjórnmálavafstri, segir í frétt Kópavogsfrétta.

Samfylkingarfólk samþykkti tillögu um að stjórn skipi uppstillinganefnd sem ákveði röð frambjóðenda á lista flokksins fyrir næstu sveitarstjórnarkosningum sem fram fara næsta vor.