Facebookbanni á Landspítalanum aflétt

„Það er stóra málið hjá okkur að opna þá samskiptaleið sem Facebook býður upp á,“ segir Páll Matthíasson, nýr forstjóri Landspítalans, um þá ákvörðun að opna fyrir aðgang að Facebook í húsnæði spítalans.

Páll segir að frá því á árinu 2009 hafa hvorki starfsmenn né sjúklingar á Landspítalanum komist inn á Facebook í gegnum net spítalans. Hins vegar hefur orðið mikil þróun í notkun samfélagsmiðla á borð við Facebook í heilbrigðisþjónustu víða um heim og fremstu sjúkrahús heimsins, svo sem Mayo Clinic í Bandaríkjunum, leiða þá þróun.

Páll hefur sjálfur sótt ráðstefnu um notkun samfélagsmiðla í heilbrigðisþjónustu og er áhugasamur um þróunina á því sviði. Hann segir að spítalinn ætli einnig að stofna sína eigin Facebook síðu og sú síða sé í vinnslu.

„Við höfum horft í því sambandi til lögreglunnar og fengið ráðgjöf frá þeim við undirbúning síðunnar. Lögreglan er eins og við, stór og fyrirferðarmikil þjónustustofnun, og þeir hafa leyst þetta mjög vel,“ segir Páll.

„Tilgangurinn er ekki í sjálfu sér að vera sýnilegur á Facebook, heldur eiga samtalið við samfélagið. Við reiknum með að sá samskiptamáti kunni að breytast og munum fylgja þeirri þróun. En þetta eru fyrstu skrefin hjá okkur”.