Pakka innfluttu kjúklingakjöti inn í íslenskar umbúðir

Ásmundur Friðriksson, þingmaður Sjálfstæðisflokks, segir að íslenskir innflytjendur leiti fyrst og fremst eftir ódýrasta kjötinu en ekki því besta. Innflutt kjúklingakjöt sé pakkað inn í íslenskar umbúðir og selt á sama verði og kjúklingar sem ræktaðir eru hér á landi. Þetta kom fram í máli þingmanns á Alþingi í gær.

ESA, eftirlitsstofnun EFTA, telur að innflutningsbann íslenskra stjórnvalda á fersku kjöti, mjólk og eggjum gangi gegn ákvæðum EES-samnings. ESA hefur sent íslenskum stjórnvöldum áminningarbréf vegna þessa.

Ásmundur tók málið upp á Alþingi í gær og varaði við óheftum innflutningi á hráu kjöti.

„Ég hef velt því fyrir mér hvaða verðmæti fylgja því að búa í landi þar sem búfénaður og annar kvikfénaður er án þeirra sjúkdóma sem herja á nágrannalönd okkar. Mér finnst að við þurfum að hugsa það alvarlega hvort við höfum hlaupið á okkur og ekki staðið í lappirnar þegar þessar reglur riðu yfir okkur eða hvort við höfum ekki verið klár í slaginn þegar við samþykktum þær, hvort slíkt hafi gerst,“ sagði Ásmundur.

Ásmundur sagði að á þessu ári væri búið að flytja inn um 1.400 tonn af alifugla-, nauta- og svínakjöti ásamt öðrum tegundum.

„Mér er sagt að íslenskir innflytjendur á kjöti leiti eftir ódýrasta kjötinu, ekki því besta, og það sé síðan flutt inn. Kjötið er síðan unnið, jafnvel úrbeinað og þvegið upp úr íslensku vatni, pakkað í íslenskar umbúðir og selt á sama verði og kjúklingar sem eru ræktaðir á Íslandi. Á Íslandi er engin lyfjanotkun í kjúklingarækt; hún er algjörlega hrein, notast er við hreint vatn í hreinu umhverfi. Það sama á ekki við um innflutta kjúklinga,“ sagði Ásmundur.