Gunnar Bragi hitti varaforsætisráðherra Rússlands

Gunnar Bragi Sveinsson utanríkisráðherra átti fund með Arkady Dvorkovich varaforsætisráðherra Rússlands í gærkvöld er sá síðarnefndi hafði viðkomu í Keflavík.

Ráðherrarnir fóru yfir stöðu fríverslunarviðræðna EFTA og tollabandalags Rússlands, Kasakstans og Hvíta-Rússlands. Utanríkisráðherra lagði áherslu á mikilvægi þess að tryggja framgang í viðræðunum á næstunni.

Einnig ræddu ráðherrarnir tvíhliða samskipti ríkjanna, t.d. á sviði jarðhita og fjarskipta. Varaforsætisráðherrann skýrði frá undirbúningi Rússa vegna vals á staðsetningu fyrir Heimssýninguna 2020 en Rússland býður fram borgina Ekaterínburg.