Menn eru að gera sig "eldklára“

Íslensk kona sem býr rétt við skógareldana í Nýja Suður Wales fylki í Ástralíu, segir mikinn viðbúnað í borginni vegna eldanna. Elín Björg Björnsdóttir hefur búið í bænum Wollongong, ásamt manni sínum og tveimur börnum, síðustu þrjá mánuðina. Hún segir stærsta eldinn í um 70-80 kílómetra frá fjölskyldunni, hann sé stjórnlaus og þar í kring sé mesta eyðileggingin.

„Hins vegar eru eldar hér í kringum okkur líka, einn sem er bara 30 kílómetrum frá. Yfirvöld fylgjast líka vel með honum, en hann er líka nokkurn veginn stjórnlaus,“ segir Elín í viðtali við Vísi.

Hún segir fólk auðvitað vera hrætt og þeir sem búa í úthverfum séu virkilega smeykir við að missa allt sitt. Mikið af dýrum hafa verið að hverfa, hundar og kettir ásamt því sem flestir séu að gera sig „eldklára“, með því að fjarlægja allt eldfimt af jörðum sínum og vökva bæði lóðir sínar og hús.

„Það er mikill samhugur í fólki og við hugsum mikið til þeirra sem eru að berjast beint við eldinn. Yfirvöldum er annt um að fólk reyni að lifa lífinu áfram, þeir skólar, sem hafa verið lokaðir í einhverja daga, verði opnaðir sem allra fyrst og fólk reyni að komast aftur til sinna daglegu venja sem fyrst.“

Vísir sagði frá því í morgun að óttast er að nokkrir þeirra kjarr- og skógarelda sem nú loga í Nýja Suður Wales fylki séu við það að renna saman í einn risastóran eld. Fjöldi slökkviliðsmanna hefur síðastliðna daga barist við eldana en veðurspár gera nú ráð fyrir enn meiri hita og þurrki sem lofar ekki góðu fyrir slökkvistarfið.