Megrunarfæði ógnar heilsu barna

„Að ala leikskólabarn á megrunarfæði ógnar eðlilegum vexti þess, heilsu og þroska. Slíkar beiðnir ættu umsvifalaust að hringja varúðarbjöllum í hugum leikskólastarfsfólks,“ segir Sigrún Daníelsdóttir sálfræðingur í pistli sem hún birti á Eyjunni í gær.

Þar vísar Sigrún í frétt af Stöð 2 þar sem fjallað var um séróskir foreldra leikskólabarna um um mataræði barnanna. Í fréttinni kemur fram að mikið sé beðið um að börn séu á glútenlausu, kolvetnaskertu eða fitusnauðu fæði. Hún segir þó að vel megi vera að oft séu eðlilegar ástæður þar að baki eins og fæðuóþol, trúarsiðir eða ofnæmi.

„Hins vegar má einnig gera ráð fyrir því, miðað við þau óttablöndnu viðhorf til matar sem margir virðast hafa tileinkað sér nú á dögum, að stundum liggi fátt annað að baki slíkum kröfum en matarfælni og áttruflanir foreldranna sjálfra. Það er mikilvægt að leikskólar séu á varðbergi gagnvart slíku og skoði málið vandlega ef foreldrar bera upp óhóflegar eða óeðlilegar kröfur um mataræði barna sinna.“

Sigrún segir að aldrei ætti að samþykkja mataræðiskröfum sem samræmist ekki næringarþörfum barna og að beiðnir um slíkt ættu að vekja grunsemdir um aðbúnað og velferð barnsins. „Ég vona að allir sem vinna með börnum geri sér grein fyrir því að þeim ber lagaleg skylda til þess að tilkynna til barnaverndar ef grunur vaknar um að barn búi við aðstæður sem ógna heilsu þess og velferð,“ segir Sigrún.

Ennfremur segir Sigrún mikilvægt að þeir sem vinni með ungum og jafnvel ómálga börnum beiti gagnrýnni hugsun þegar kemur að kröfum og óskum foreldra um mataræði þeirra. „Ég efast ekki um að oft eigi séróskirnar rétt á sér en það er samt mikilvægt að skýr rökstuðningur liggi fyrir ef halda á tilteknum fæðutegundum frá börnum. Velferð barnsins verður alltaf að ráða.“