"Væri heimurinn á hliðinni ef Maria væri ekki ljóshærð?“

„Það er varhugavert að fólk sem tilheyrir ákveðnum þjóðfélagshópum, sé sjálfkrafa álitið líklegra til glæpsamlegrar hegðunar en aðrir,“ segir Katrín Oddsdóttir, lögfræðingur um fjölmiðlafárið sem orðið hefur vegna Mariu litlu sem tekin var af rómafólki í Grikklandi.

Nú hefur önnur stúlka verið tekin frá fjölskyldunni sinni í Dublin í Írlandi, sú er ljóshærð og ólík fjölskyldu sinni sem er af rómaættum. En foreldrar þeirrar stúlku hafa ekki getað sannað að þau séu raunverulegir foreldrar hennar.

Katrín segir umhugsunarvert að þegar ljóshært barn sé hjá rómafólki, þá fari heimurinn hreinlega á hliðina. Hún minnir á að það sé ótrúlegur fjöldi barna í heiminum sem sé munaðarlaus og eigi því ekki fjölskyldulíf eins og þau eigi rétt á samkvæmt Barnasáttmála Sameinuðu þjóðanna.

„Það er áhugavert að spyrja, væri heimurinn að fjalla um þetta mál ef barnið væri ekki ljóshært,“ spyr Katrín. „Það virðist allavega vera, að litarhaft spili stóran part.“

Katrín segir að ef marka megi fréttaflutning af málinu komi í ljós að það gæti verið að þau hafi ættleitt stúlkuna með vafasömum hætti. Hún segir að því miður sé mikið um slíkar ættleiðingar og það sé að sjálfsögðu alvarlegt mál.

„Auðvitað verður að skoða það hvort þau hafi eignast stúlkuna með glæpsamlegum hætti, ef svo er, er það að sjálfsögðu grafalvarlegt, en það er líka alvarlegt að það sé talið að það að alast upp hjá rómafólki, sé ekki hvítum börnum boðlegt,“ segir Katrín.

„Það er greinilega ekki sama hver á í hlut, þetta barn talar til dæmis bara rómamál og það er bara tekið frá þeim sem hafa alið hana upp, eins og það sé hafið yfir allan vafa að það sé best að hún sé tekin af því fólki sem hún þekkir best,“ segir Katrín.