Hryntónlistarmenn til fárra fiska metnir

Jakob Frímann Magnússon, formaður Félags tónskálda og textahöfunda, segir að útflutnings- og þróunarsjóður upp á litlar 20 milljónir hafi fokið fyrir lítið í nýju fjárlagafrumvarpi.

Jakob Frímann skrifar harðorða grein sem birtist í Fréttablaðinu í dag. Þar segir hann að hryntónlistarmenn; þeir sem fást við jazz, popp- og rokktónlist, megi búa við að vera lítilsvirtir og smáðir þó þeir dragi vagninn á margan hátt. Í grein hans kemur fram að Útflutnings- og þróunarsjóður hafi loks orðið til eftir mikla baráttu, sjóður sem ætlað var að styðja við bak tónlistarmanna sem þessa tónlist stunda, lofað hafi verið 150 milljónum í sjóðinn upphaflega, þegar til kom 2012 reyndust það 20 milljónir og þær fuku svo fyrir lítið í nýju fjárlagafrumvarpi.

„Við ímyndum okkur að þetta hafi verið sjálfkrafa aðgerð í stærri útskriftarpakka tengdum skapandi greinum. Sjóðnum var mikið fagnað þegar tilkynnt var um hann á síðasta ári og við leyfum okkur að vonast til að þetta megi flokkast undir mistök, það að hann hafi verið þurrkaður út. Við vonum það,“ segir Jakob.

Hlutur hryntónlistarmanna, sem Jakob nefnir svo, er rýr; lítil kaka af því sem þó fer til menningar og lista. „Þetta er annað skiptið í röð sem FTT mælir heildarframlög ríkis og sveitarfélaga til tónlistarlífs. Og hryntónlistin öll; jazz, rokk, popp, vísnatónlist, blús... er öll samanlög innan við 5 prósenta mörkin af heildarframlögum. Það þykir mörgum skjóta skökku við. Svipað hlutfall og var um miðja síðustu öld.“

Þannig að ykkar hlutur er fremur rýr í því samhengi?

„Í ljósi hins stóra samhengis, yfir 200 tónleika í mánuði hverjum, af íslenskum toga, með öllum tilheyrandi kostnaði, þá þætti þetta ekki sérlega veglegt atfylgi neins staðar annars staðar.“

Og hin 95 prósentin liggja þá hvar?

„Í öllu öðru skulum við segja. Öllu sem æðra getur talist,“ segir Jakob Frímann og ekki örgrannt um að í þessari síðustu setningu megi greina háðskan og jafnvel bitran tón.