Kíkti á miðann eftir umræður á Facebook

Tveir voru með allar tölurnar réttar í lottóinu síðastliðinn laugardag. Annar miðinn var sjálfvalsmiði ásamt jóker en hinn áskriftarmiði. Tölurnar voru óvenjulega lágar síðastliðinn laugardag, en þær voru 3-4-5-7-10 og bónustalan 25.

Nokkuð margir voru með 4 réttar tölur, eða alls 232 spilarar. Það voru þó einungis 2 sem voru með allar tölurnar réttar.

Annar vinningshafanna hafði dreymt fyrir um 20 árum tölurnar í röðinni, og sett í áskrift. Á laugardaginn komu tölurnar upp. Fjölskyldan sem vann var nýbúin að vera með fasteignasala í heimsókn hjá sér til að verðmeta húsnæði sitt, því þau ætluðu að minnka við sig til að draga úr skuldum.

Eftir að þau unnu hafa þau ákveðið að vera áfram í húsinu sínu og greiða niður áhvílandi skuldir og leyfa sér svo jafnvel að fara í framandi utanlandsferð sem hjónunum hefur lengi dreymt um.

Hinn vinningshafinn var ung þriggja barnamóðir frá Akranesi. Í tilkynningu frá Íslenskri getspá segir að veðrið á Akranesi hafi verið svo gott í síðustu viku og hafi konan ákveðið að bóna bílinn, og kaupa svo 10 raðir í lottó og Jóker. Hún fattaði að þegar vinir hannar á Facebook fóru að spyrjast fyrir hver hefði verslað sér lottómiða í Olís á Akranesi og unnið pottinn. Konan fór þá út í bíl og náði í miðann sinn, og ætlaði ekki að trúa sínum eigin augum.

Hún vann rúmlega 31 milljón króna og ætlar að kaupa sér draumabílinn sinn og greiða upp skuldir.