Segir heilbrigðiskerfið orðið annars flokks

„Íslenska heilbrigðiskerfið er nú orðið annars flokks.“ Þetta fullyrðir hámenntaður hjartalæknir sem hefur sagt takk og bless og pakkar nú niður í ferðatöskurnar. Förinni er heitið til Noregs þar sem launin eru margfalt betri og vinnuaðstæður ekki sambærilegar þeim sem finna má hér.

Læknaflótti er staðreynd á Íslandi. Landið er ekki samkeppnishæft um sína eigin lækna, sama hvort að litið er til unglækna eða sérfræðinga. Eins og fram kom á nýafstöpnum aðalfundi læknafélags Íslands er þörf um á umtalsverðum kjarabótum til að snúa þessari þróun við. Það verður hægara sagt en gert. Af þeim tvö hundruð læknum sem haldið hafa erlendis frá árinu 2009 hafa aðeins hundrað snúið aftur til baka.

„Hugtakið vitsmunaflótti var fyrst notað eftir seinna stríð til að lýsa flótta vísindamanna og tæknimenntaðra frá Evrópu til Norður-Ameríku. Sambærileg þróun á sér nú stað á Íslandi þar sem tækifæri hámenntaðra einstaklinga eru að finna utan landsteinanna. Heilbrigðisgeirinn hefur ekki orðið hvað verst úti þegar vitsmunaflótti er annars vegar.“

Ágúst Örn Sverrisson er einn af þeim fjölmörgu sérfræðingum sem ákveðið hafa að yfirgefa landið. Hann er á leið Noregs þar sem honum var boðin stöðuhækkun, betri vinnuaðstöða og mun betri laun.

„Þú færð ekki eðlilega endurnýjun utan frá þegar staðan er svona. Maður verður að spyrja sig hvað veldur og hvernig eigi að bregðast við. Það hlýtur að vera ansi mikll dómur yfir íslensku heilbrigðiskerfi þegar staðan er svona. Ég er ansi hræddur um að við séum að horfa fram á að það íslenskt heilbrigðiskerfi sé nú annars flokks,“segir Ágúst.

Ágúst segist yfirgefa landið með trega. Engu að síður sé það í raun óforsvaranlegt að halda áfram hér undir núverandi kringumstæðum, þá sérstaklega þegar litið er til unglækna, sjálfrar framtíðar heilbrigðiskerfisins sem horfast í augu við óljósa tíð í heilbrigðismálum á Íslandi.

„Ég verð að segja það að það eru ekki miklar líkur á því að þetta fólk snúi aftur heim á næstu árum eftir sitt sérnám. Það er alveg á hreinu. Það þarf að skapa einhverja framtíðarsýn. Það að við höfum ekki enn ráðist í það að reisa nýtt sjúkrahús er einfaldlega hneisa.“