Stálu myndavél og riffli

Brotist var inn í íbúðarhúsnæði í Sandgerði og þaðan stolið myndavél og öflugum riffli. Brotist var inn með því að brjóta upp glugga með skrúfjárni sem fannst á vettvangi. Á efri hæð hússins hafði málverk á vegg verið skemmt með því að reka í gegnum það oddhvasst járnstykki.

Lögreglan á Suðurnesjum hóf þegar rannsókn málsins og fékk fljótt spurnir af nokkrum ungmennum sem væru að skjóta úr skotvopni á Sandgerðisheiðinni og voru fjórir piltar yfirheyrðir. Riffilinn fundu lögreglumenn síðan í öðru húsnæði, þar sem hann hafði verið falinn uppi á háalofti. Myndavélin hafði verið seld fyrir fíkniefni. Málið telst upplýst.