Síldveiðiflotinn nánast kominn í kartöflugarðana í Helgafellssveit

Oft hafa stóru síldveiðiskipin verið býsna nálægt landi við Stykkishólm á undanförnum árum, en þetta hef ég ekki séð áður, sagði Hólmari sem fylgdist með flotanum að veiðum við sveitabæina í Helgafellssveit í gær. Þrjú skip, Börkur, Jóna Eðvalds og Kap, voru þá á veiðum í einum hnappi á Hofsstaðavogi, við bæina Staðarbakka, Kljá og Kóngsbakka, og svo nærri að menn spurðu sig hvort þeir ætluðu að kasta nótinni á kartöflugarðana í landi.

Fjórða skipið, Lundey, var utar, en auk stóru skipanna var um tugur smábáta einnig að síldveiðum á sömu slóðum, innan um eyjarnar á Breiðafirði. Net smábátanna lágu svo þétt þarna að skipstjórinn á Jónu Eðvalds, Sigurður Bjarnason, segist ekkert hafa geta kastað á torfuna á föstudag. Það tókst honum hins vegar í gær, við Purkey.

Þegar Sigurður skipstjóri var spurður um dýpið þarna svaraði hann að það hefði í raun ekki verið neitt. „Það sló saman á dýptarmælinum. Það kom bara drullan undan,“ og sagði að skipið hefði þá farið yfir hrygg en það ristir um 6 metra. Spurður hvort hann hefði rekist í botninn sagði hann að einhverjir um borð teldu sig hafa fundið fyrir einhverju en sjálfur kvaðst Sigurður ekki hafa fundið fyrir neinu. Hann tók fram að þetta væri ekki óskastaðan.

Jóna Eðvalds fyllti sig þarna í tveimur köstum og er nú á leið til Hornafjarðar með 930 tonn af mjög góðri síld, að sögn Sigurðar skipstjóra, en meðalþyngd síldarinnar segir hann um 350 grömm. Hann áætlar að koma til Hafnar í kvöld. Börkur er á leið til Neskaupstaðar með 1.000 tonn en Kap fékk frá honum 200 tonn og er á leið til Vestmannaeyja með 500 tonn. Lundey kastaði ekki í gær en verður á miðunum í dag.

Litlu bátarnir sem lönduðu í Stykkishólmi virðast einnig hafa átt góðan dag. Einn var að landa 5 tonnum og annar 3,5 tonnum þegar tíðindamaður átti leið um löndunarbryggjuna.