Dæmdur fyrir kynferðisbrot gegn 14 ára stúlku

Tvítugur karlmaður var í dag dæmdur í Héraðsdómi Austurlands í eins árs skilorðsbundið fangelsi fyrir kynferðisbrot gegn barni.

Maðurinn sem var 19 ára þegar brotið átti sér stað, hafði ekki áður gerst brotlegur við refsilög áður. Brotið átti sér stað í ágúst í fyrra en þá var stúlkan sem hann braut gegn 14 ára.

Maðurinn játaði við þingfestingu málsins en hafnaði bótakröfu.

Af hálfu ákærða var á það bent fyrir dóminum að annað sakamál væri rekið, þar sem annar maður sé ákærður fyrir samskonar brot gegn sömu stúlku. Það brot átti sér stað fáeinum dögum eftir brot ákærða. Hann benti einnig á að engin sérfræðileg gögn lægju fyrir sem styddu það að stúlkan hefði orðið fyrir tjóni af völdum ákærða.

Í dóminum segir að ljóst sé að brot af þeim toga sem ákærði væri skakfelldur fyrir væru almennt til þess fallin að valda þeim sem fyrir yrðu margvíslegum sálrænum erfiðleikum. Brot ákærða hefðu meðal annars falið í sér ólögmæta meingerð í garð brotaþola.

Þar segir einnig að í lögunum er fortakslaust bann við samræði og öðrum kynferðismökum við börn undir 15 ára aldri. Það er sett í lögin til verndar börnum og ungmennum af tilliti til þroska þeirra.

Í dóminum segir að í ljósi hreinskilnislegrar játningar ákærða frá upphafi rannsóknar málsins og þess sem fram kemur í rannsóknargögnum um atvik máls að öðru leyti þyki refsing hans hæfilega ákveðin fangelsi í eitt ár.

Lágmarksrefsing við brotinu er eins árs fangelsi og hámarksrefsins er 16 ár. Í lögunum er heimild til þess færa refsingu niður fyrir lögbundið lágmark ef gerandi og þolandi eru á svipuðum aldri og þroskastigi. Aldursmunur með ákærða og brotaþola þótti ekki slíkur að að skilyrði væru til þess að beita þeirri heimild.