Færa vandann á milli landshluta

Eiríkur Björn Björgvinsson, bæjarstjóri á Akureyri, harmar þá ákvörðun ríkisstjórnarinnar að loka útibúi Umboðsmanns skuldara á Akureyri.

Í tilkynningu til fjölmiðla segir Eiríkur Björn að óhætt sé að fullyrða að mikil þörf er fyrir starf embættisins á Eyjafjarðarsvæðinu, og á Austurlandi.

„Á Eyjafjarðarsvæðinu búa innan við 8% þjóðarinnar en til útibúsins á Akureyri hafa þó borist u.þ.b. 360 umsóknir (en ekki 320 eins og mishermt hefur verið) sem er 12% af heildarumsóknum til stofnunarinnar á landsvísu,“ segir í tilkynningunni.

Bendir hann á að fækka eigi stöðugildum um 15, úr 70 í 55. 

„Fæ ég engan veginn séð hvers vegna skera þarf niður þau 2 stöðugildi sem verið hafa á Akureyri þar sem eftirspurn eftir þjónustunni er þó jafn mikil og raun ber vitni. Afar brýnt er að verja þau opinberu störf sem sinnt er á landsbyggðinni og skýtur skökku við að loka nú útibúinu á Akureyri sem þýðir einvörðungu að leysa verður úr vanda þessara 12% umsækjenda frá skrifstofunni í Reykjavík,“ segir hann.