Umfjöllun um ofbeldi í skólum: "Án frekari orða ræðst hún á son minn"

Foreldrar sem telja kennara eða aðra skólastarfsmenn hafa brotið á börnum þeirra, eru leiðir á þöggun. Þeir vilja þessi mál fram í dagsljósið og koma þeim í farveg svo rétt verði brugðist við þeim í framtíðinni.

Faðir á höfuðborgarsvæðinu, sem hefur átt börn í fjórum skólum, segir tvo þeirra mjög góða en að í hinum hafi börn hans ítrekað þurft að þola ofbeldi. Hann segir alvarlegasta atvikið hafa átt sér stað síðasta vetur. Þá hafi níu ára sonur hans skipt um skóla, lent þar í einelti og einn daginn lent saman við helsta gerandann. Drengirnir hafi ýtt hvor við öðrum á víxl en kennari hafi komið að þeim í skólastofunni einmitt þegar sonur hans hafi hrint hinum drengnum. „Hún (kennarinn; innsk. blm.) sér þetta og umsvifalaust án frekari orða ræðst hún á son minn og tekur hann spennitreyjutaki, eins og mér er sagt að það sé kallað. Hún stendur fyrir aftan nemandann, heldur höndunum á honum krosslögðum og keyrir hann niður á hnén af öllum líkamsþunga,“ segir faðirinn.

Fyrir tilviljun gekk hann einmitt inn í kennslustofuna á þessum tímapunkti. „Ég kem inn í skólastofuna og sé kennara keyra nemanda í gólfið. Ég átta mig ekki á aðstæðum, bregður og segi stundarhátt: Hver djöfullinn gengur á hér á? Þá sleppir hún, stendur upp og þá sé ég að þetta er sonur minn, grátandi í gólfinu. Hún strunsar framhjá mér, út úr stofunni og heilsar mér ekki.“

Faðirinn kveðst fyrst hafa rætt við skólaskrifstofu og síðan barnaverndarnefnd. Honum hafi verið vel tekið og lofað rannsókn en síðan hafi honum aðeins borist tilkynning um að ekkert óeðlilegt hafi átt sér stað. „Og mér var stillt upp eins og ég væri hinn seki í málinu. Hvað ert þú að rugga þessum báti?“

Faðirinn fór fram á afsökunarbeiðni fyrir drenginn en fékk ekki. Hann segir mikið vanta upp á að mál fari í farveg strax. „Þar sem allir eru upplýstir og meðvitaðir um hvað sé verið að gera, ef nokkuð,“ segir hann að lokum.