Enn bið eftir fríu interneti í Flugstöð Leifs Eiríkssonar

Ekkert bólar á fríu þráðlausu interneti í Flugstöð Leifs Eiríkssonar. Í byrjun sumars stóð til að hætta að rukka farþega í Keflavík fyrir aðgang að þráðlausu neti. Þar með myndi Flugstöðin bætast í hóp flughafna þar sem netsamband er frítt. Túristi.is greinir frá þessu.

Meira en áttatíu norrænar flugstöðvar bjóða upp á þessa þjónustu án endurgjalds. Það hefur reynst flóknara en gert var ráð fyrir að koma upp þráðlausum netbúnaði í flugstöðinni í Keflavík. Samkvæmt upplýsignum frá Isavia, rekstraraðila flugvallarins, þá þurfti að kaupa sérstakan búnað til þess að ráða við það álag á tölvukerfið sem notkunni fylgir. Hefja á prófanir að nýju um miðjan nóvember.

Farþegar í Flugstöð Leifs Eiríkssonar þurfa að greiða fyrir notkun sína að þráðlausu interneti. Klukkustund kostar 490 kr.-, fjórir tímar kosta 990 krónur og sólarhringur 1990 krónur.