Kynhneigð Hannesar ekki kveikjan að verkinu

Kveikjan að leikverkinu Maður að mínu skapi - stofuleikur var hvorki persóna Hannesar Hólmsteins Gissurarsonar né samkynhneigð. Og þaðan af síður kynhneigð Hannesar Hólmsteins, þetta segir Bragi Ólafsson höfundur verksins í aðsendri grein í Fréttablaðinu í dag. „Guðgeir Vagn, sá sem talinn er vera skopstæling á Hannesi Hólmsteini, líkist í engu þeirri meintu fyrirmynd, hvorki í útliti, látbragði né talsmáta.“

Verkið hefur vakið töluverða athygli fyrir efnistök. Í Kastljósi á miðvikudag sagði Hannes að Bragi hefði helst skaðað sjálfan sig, hann væri fórnarlamb eigin fórnarlamb gagnvart samkynhneigðum.

Bragi segir að með því að ásaka höfund verksins um fordóma og fyrirlitningu í garð samkynhneigðs fólks hafi það hugsanlega þann tilgang að draga athyglina frá efni leikritsins og um leið gera slíkar ásakanir lítið úr samkynhneigðum með því að gefa í skyn að ekki megi gera grín að þeim.

„Ein uppspretta verksins er bók með fleygum orðum sem Hannes Hólmsteinn Gissurarson tók saman; bók sem mér fannst vera frjór jarðvegur til að vinna úr skáldskap, og öllum er frjálst að nota að vild, jafnvel snúa út úr eða afbaka, segir Bragi.

„Hingað til hef ég reynt að forðast að tjá mig um merkingu eða inntak skáldverka minna – slíkt er ekki hlutverk höfundar – en þar sem umræðan um þetta tiltekna verk, Maður að mínu skapi, er farin að litast af rangfærslum, og alvarlegum ásökunum þeirra sem ekki hafa séð verkið, þá vil ég ítreka að þetta er skáldverk frá grunni, um skáldaðar persónur; og fjalli það um eitthvað ákveðið í mínum huga, þá myndi það vera óheiðarleiki, afneitun og valdafíkn – og skáldskapur sem fer úr böndunum.“