Lögregla reif upp plankana

Lögreglumenn fjarlægðu litríka planka sem umhverfis- og samgöngusvið Reykjavíkurborgar festu niður á gangbraut við Laugardalshöll í dag.

Ástæðan fyrir því að plankarnir voru teknir var samskiptaleysi Reykjavíkurborgar og lögreglu og segir Dagur B. Eggertsson borgarfulltrúi að lögreglumennirnir hafi ekki vitað að plankarnir væru á vegum borgarinnar.

„Það er verið að festa þá niður aftur,“ segir Dagur en plankarnir verða einungis á gangbrautinni í nokkra daga en ekki til frambúðar eins og greint var frá í dag. „Það eru svo snör handtök í henni góðu Reykjavík,“ segir Dagur sem telur samstarf lögreglunnar og borgaryfirvalda almennt vera frábært.

„Það fengust ekki betri upplýsingar frá borginni en svo að þetta var fjarlægt,“ segir Stefán Eiríksson, lögreglustjóri lögreglunnar á höfuðborgarsvæðinu. „Ég geri ráð fyrir því að borgin komi þessu bara aftur fyrir.“

Þegar ljósmyndara bar að garði rétt fyrir klukkan 19 var þó ekki byrjað að festa niður plankana.