Össur segir utanríkisráðherra hafa slegið Íslandsmet

Utanríkisráðherra sagði á Alþingi í morgun að ríkisstjórnin hefði metnaðarfulla stefnu varðandi Evrópusambandið þar sem EES samningurinn væri helsta stoðin. Hann hefur leyst upp samninganefnd Íslands í aðildarviðræðunum við sambandið.

Umræða um stöðu Evrópumála fór fram á Alþingi í morgun. Gunnar Bragi Sveinsson utanríkisráðherra sagði ríkisstjórnina leggja áherslu á náið samstarf við Evrópusambandið þar sem EES-samningurinn væri meginstoðin. Hann hefur hins vegar leyst upp samninganefnd Íslands og sagði hann á þingi í morgun að það væri í samræmi við stefnu stjórnarinnar um að gera hlé á viðræðunum.

„Afstaða beggja stjórnarflokkanna er skýr. Flokkarnir leggjast gegn aðild að Evrópusambandinu. Landsfundir beggja flokka samþykktu að ef halda ætti ferlinu áfram, yrði það eingöngu gert að undangenginni þjóðaratkvæðagreiðslu. Og fólk getur treyst því að ekki verður haldið áfram viðræðum nema að undangenginni þjóðaratkvæðagreiðslu.“

Utanríkisráðherra sagði þetta þýða að ekki yrðu haldnar fleiri ríkjaráðstefnur milli Íslands og Evrópusambandsins. Hann hefði fengið Hagfræðistofnun Íslands til að gera óháða úttekt á stöðu viðræðnanna og þróunarinnar innan sambandsins, en allt benti til að samstarf aðildarríkja sambandsins myndi dýpka í framtíðinni vegna efnahagskreppunnar. Stefna ríkisstjórnarinnar væri í samræmi við stjórnarsáttmálann.

„Engar skemmdir hafa verið unnar á einu né neinu. Aðildarumsókn hefur ekki verið afturkölluð Engu hefur verið slitið. Þannig höfum við staðið að þessu máli í góðri sátt við gagnaðila okkar. Enda bera viðbrögð Evrópusambandsins ekki merki annars en sambandið hafi fullan skilning á ákvörðun okkar um hlé á aðildarferlinu,“ sagði Gunnar Bragi

Utanríkisráðherra sagði skýrslu Hagfræðistofnunar verða tekna til umræðu á Alþingi þegar henni væri lokið.

„Ekki er tímabært að velta fyrir sér framhaldi aðildarferilsins fyrr en skýrslan hefur verið gerð. En rökföst og málaefnaleg umræða mun án efa eiga sér stað innan þingsins um efni hennar og hlakka ég mjög til þess,“ sagði utanríkisráðherra.

Össur Skarphéðinsson fyrrverandi utanríkisráðherra sagði Gunnar Braga hafa sett Íslandsment í ræðu sinni.

„Því honum tókst í einni ræðu bæði að fara gegn eigin yfirlýsingum, storka fullveldi Alþingis og líka fara gegn stefnu ríkisstjórnarinnar,“ sagði Össur.

Því leiðtogar stjórnarflokkanna hefðu báðir lýst yfir að þjóðaratkvæðagreiðsla færi fram um áframhald viðræðna eftir að skýrslur um málið hefðu verið lagðar fram. Með því að setja samninganefnd Íslands af sniðgengi utanríkisráðherra vilja þingsins og hefði í raun stigið fyrsta skrefið til að slíta viðræðunum.

„Ég geri mér alveg grein fyrir hinum pólitíska veruleika málsins. En orð skulu standa. Forystumenn í stjórnmálum verða að standa við það sem þeir lýsa yfir,“ sagði Össur. Miðað við yfirlýsingar forystumanna stjórnarflokkanna væri eðlilegt að almenningur byggist við þjóðaratkvæðagreiðslu um málið á kjörtímabilinu en eekki einhvern tíma á öldinni.

Þróun mála að undanförnu hefði leitt til aukisns stuðnings meðal þjóðarinnar við að klára viðræðurnar og á sama tíma hefði fylgi Framsóknarflokksins dalað í könnunum.