Ragnar Bragason gerir samning við APA umboðsskrifstofuna

Ragnar Bragason kvikmyndaleikstjóri og Þorbjörg Helga Dýrfjörð leikkona hafa skrifað undir samning við bandarísku umboðsskrifstofuna APA í kjölfar sýningarinnar Málmhaus (e.Metalhead) á kvikmyndahátíðinni í Toronto.

Ragnar var að ganga frá samningnum við umboðsskrifstofuna. „Þeir verða augu mín og eyru vestan hafs. Þetta snýst um að búa til kontakta og koma sínum verkum á framfæri, bæði gömlum og nýjum.“

Ragnar var á hátíðinni í Toronto sem kláraðist um helgina. Málmhaus var sýnd 7. september og að sögn Ragnars er þetta íslensk sveitasaga.

„Myndin er um fjölskyldu sem er að takast á við dauðsfall í fjölskyldunni og hver og einn gerir það á sinn hátt. Aðalpersónan er ung kona sem Þorbjörg Helga leikur og hún tekst á við sorgina í gegnum þungarokk,“ segir Ragnar.

Myndin verður frumsýnd á Íslandi 11. október næstkomandi.