Þýskir rútubílstjórar smygla varningi til landsins

Árni Elísson, hjá tollinum á Seyðisfirði, segir að þeir þar hafi gert varning, sem þýskir rútubílstjórar hafa með sér til landsins þegar þeir koma með Norrænu, upptækan í stórum stíl.

Vísir greindi frá því í gær að þýskur rútubílstjóri henti Úlrik Artúrssyni leiðsögumanni úr rútu sinni fyrir helgi með ókvæðisorðum og sakaði hann um að hafa af sér háar fjárhæðir með því að leiðbeina ferðamönnum í stórmarkaði – þeir væru þá ekki að versla mat og drykk af sér á meðan.

Þetta tiltekna dæmi, ævintýri Úlriks, kemur Árna Elíssyni tollara á Seyðisfirði á óvart, því þetta er rúta sem hann fór persónulega í, hirti þaðan mikið af varningi og sá varningur sé á skrifstofu hans. Árni ætlar að eiga orð við bílstjórann þá er hann fer á morgun. Árni segir þetta vissulega vandamál, að rútubílstjórar séu með veitingasölu um borð í rútum sínum. En kannski ekki eins umfangsmikið og margir ætla.

„Ég held að þetta sé ekki víðtækt vandamál. Hins vegar þekkist þetta. Við erum búnir, alveg frá því snemma í vor, að fara í flestar rútur, ekki allar, þannig að einhverjir hafa farið fram hjá okkur, við höfum hreinlega ekki „kapísatet“ til að gera meira, en við erum búnir að taka úr mjög mörgum rútum allskyns söluvarning.“

Árni segir það koma sér á óvart, í ljósi þess að þeir hjá tollinum í Seyðisfirði hafa gert upptækan varning í stórum stíl í sumar, ef margar rútur eru á ferð með varning sem verið er að selja. Hann segir fyrirliggjandi að þeir sem haga málum svo séu að brjóta margvísleg lög.

„Óheimilt er vitaskuld að flytja inn slíkan varning; áfengi og matvöru – þeir geta ekki komið með það tollfrjálst til landsins og byrjað að selja. Síðan er óheilmilt að selja um borð í rútum. Þeir hafa ekki veitingaleyfi til þess.

Einkum eru þetta þýskir bílstjórar sem um ræðir sem drýgja tekjur með þessum hætti. Búdrýgindi sem slík tíðkast í Evrópu þannig að þarna er um einhvers konar menningarmun að ræða. Ekki eru fyrirliggjandi hversu margar erlendar rútur á ferð um landið á hverjum tíma en vikulega yfir sumartímann koma fjórar til fimm rútur til landsins með Norrænu auk þess sem einhverjar geta komið með frakt með Eimskip og Samskipum.