KR-hundurinn er pínulítill Chihuahua-rakki sem heitir Hjútli

"Já þetta er hundur eða á fagmáli; rakki. Hann er fjögurra ára síðan í janúar, fæddur undir Lukku-Stjörnu í Garðabænum og er þar af leiðandi með blátt blóð í æðum. Hann kom til mín í vesturbæinn 1. maí 2009 og kom fljótlega í ljós að hann er lukkudýr því þegar ég labbaði með hann KR-hringinn þá skoruðu KR-ingar," segir Hulda Krístín Jóhannesdóttir eigandi lukkudýrs KR-inga.

Krúttheit í bulluskapnum

Lukkudýr KR-inga er lítill Chihuahua-hundur sem heitir Hjútli og er Rambóson. Myndir af honum og eldheitum KR-ingum eru farnar að birtast hér og þar, meðal annars af Hjútla og Ágústi Borgþór Sverrissyni rithöfundi en hann er eldheitur KR-ingur. Aðspurður hvort hann hefði ekki frekar viljað sjá vígalegri hund en Chihuahua sem sjálfan KR-hundinn segist hann ekki hafa velt því fyrir sér. "Þetta er bara einn af þessum skemmtilegu og ófyrirsjáanlegu hlutum sem verða til í þessum kúltúr. Verða ekki að vera krúttheit í þessu líka?"

Tvö og hálft kíló af hreinni lukku

Ágúst Borgþór segir Hjútla vissulega písl og hann hafi fengið hálfgerðan móral þegar hann var að öskra einhverja vitleysu við aðra myndatöku, fólk hafi haft áhyggjur af hlustum hundsins. "Ég er alveg eins og bavíani á vellinum oft."

Hulda Kristín hefur ekki svo miklar áhyggjur af þessu. Honum sé ekkert vel við lætin en honum finnist rosalega gaman á leikjum, þá fær hann nammi reglulega og allt er gott. Þegar Hulda Kristín fer með hann á leiki er hann klæddur sérstaklega upp, í KR-peysu.

"Hann er mjög ánægður að vera í peysunni og svo á hann KR-tösku sem hann bókstaflega elskar, sefur í henni heilu dagana."

Hjútli er elskaður af öllum KR-ingum enda er hann að sögn eigandans algjör lukkuhundur. "Tvö og hálft kíló af hreinni lukku."

Hvernig Hjútli varð opinber lukkuhundur

Og Hulda segir söguna af því hvernig það er til komið að Hjútli varð opinber lukkuhundur KR-inga:

"Þegar Rúnar Kristinsson var nýtekinn við KR sem þjálfari árið 2010, og allt var í volli hjá KR þá hittum við Rúnar þar sem hann var að leita af bolta sem hafði farið inn í limgerði á Meistaravöllunum. Við fórum til Rúnars og óskuðum honum til hamingju með nýja starfið og jafnframt sagði ég honum að alltaf þegar við færum á völlinn þá skoruðu KR-ingar. Þá horfir Rúnar á Hjútla og segir: Svo þetta er lukkutröllið. Og það er ekki að spyrja af því að Hjútli fann boltann sem kostaði víst 11.000 krónur og við kvöddumst. Rúnar sagði okkur að koma sem oftast á leiki. Og viti menn, næsta ár varð KR Íslands- og bikarmeistari.