Ólafur Ragnar óaðfinnanlegur í klæðaburði

Við höfðum samband við Evu Dögg Sigurgeirsdóttur tískugúrú með meiru en hún á og rekur vefinn Tíska.is. Við báðum hana að skoða með okkur klæðaburð Angelu Merkel, kanslara Þýskalands sem fór lofsamlegum orðum um endurreisn íslensks efnahagslífs á fundi med Ólafi Ragnari Grímssyni forseta Íslands í morgun. Þá báðum við Evu einnig að skoða klæðaburð Ólafs og að ekki sé minnst á gula bindið sem hann var með.

Ólafur óaðfinnanlegur í klæðaburði

„Ólafur Ragnar má nú eiga það að hann er óaðfinnanlegur í klæðaburði fyrir karlmann á hans aldri og í hans stöðu enda með rétta stílistann sér við hlið 24/7. Það er í raun alveg heil pæling varðandi litaval á bindum og eru til dæmis ákveðnir litir sem virka betur í pólitískum framboðum en aðrir og þar fram eftir götunum," segir Eva Dögg þegar við skoðum með henni myndirnar af Ólafi og Angelu sem Rut Sigurðardóttir ljósmyndari tók í Berlín í morgun.

Bindið stúderað

„Ef við stúderum litapælinguna hans Ólafs á þessu bindi burt séð frá því hvort fólki finnist mynstrið fallegt eða ekki þá þykir gulur litur afar upplífgandi sálfræðilega einnig býr í honum mikil gleði og von. Ef maður túlkar hann enn frekar þá hefur hann áhrif á skapandi hugsun og á samkvæmt litasálfræðinni að hjálpa okkur að finna nýjar og hagnýtar leiðir til að framkvæma hluti."

Gulur táknar sjálfstraust og bjartsýni

„Er það ekki pínu táknrænt fyrir Ísland í dag. Gulur á einnig að vekja meira sjálfstraust og bjartsýni þannig að litavalið er laukrétt hjá forseta vorum að mínu mati. Gulur er líka litur sólar og sumars og klæðir hann vel," segir Eva.

Þekkt fyrir flest annað en að vera leiðandi í tísku

„Merkel kanslari velur hér snið og lit á jakka sem fer henni afar vel, hún hefur nú verið þekkt fyrir flest annað en að vera leiðandi í tískunni enda ekki hennar starf en hún er samt alltaf í huggulegum og vel sniðnum fatnaði."

Einkennisbúningur kanslarans

„Hún á að vísu til þennan sama jakka til í ótal litum og efnum og það mætti halda stundum að þetta væri einkennisbúningurinn hennar, blazer og svartar buxur. Hún er svo sem ekki eina manneskjan sem hefur keypt sér sömu flíkina í ótal litum."

„Jackie Kennedy sagði nú opinberlega að ef maður gæti fundið rétta sniðið sem færi manni vel þá ætti maður að kaupa nokkra liti af þeirri flík," segir Eva.

Rauður jákvæður litur og kröftugur

„Annars er rauður litur mjög jákvæður litur sem býr yfir miklum krafti. Það er sagt að rauður sé litur sem hefur mikinn kraft og traust. Rauður er litur ástarinnar en liturinn á jakkanum hennar er með frekar köldum undirtón þannig að hann minnir mann nú ekki beint á rómantík síður en svo en hann klæðir hana mjög vel."

„Það er gaman þegar maður horfir yfir hópinn að sjá hana eina í rauðu þar sem einkennislitir ráðamanna og stjórnmálamanna eru yfirleitt dökkir litir eins og til dæmis svartur eða dökkblár," segir Eva.

Vefurinn hennar Evu Daggar - Tíska.is.