Almar tók við af Jóni Rúnari

Almar Guðmundsson, formaður knattspyrnudeildar Stjörnunnar, er nýr formaður Íslensks toppfótbolta en aðalfundur félagsins var haldinn í gær.

Íslenskur toppfótbolti er samtök félaga í efstu deild á Íslandi og vinna því fyrst og fremst að sameiginlegum hagsmunum þeirra en einnig íslenskri félagsliðaknattspyrnu í heild sinni.

Jón Rúnar Halldórsson, FH, stígur því til hliðar en hann hafði verið formaður frá stofnun. Björn Einarsson, Víkingi, fer einnig úr stjórn en Borgildur Sigurðardóttir, Breiðabliki, og Jónas Gestur Jónasson, Víkingi Ólafsvík, koma inn í þeirra stað. Öll eru formenn knattspyrnudeilda í sínum félögum.

Almar segir í samtali við Vísi að það hafi ekki ríkt ósætti við störf fyrri stjórnar. „En svona starf snýst alltaf um áherslur. Þessi félagsskapur er enn að slíta barnsskónum. Við erum búin að ná ákveðnum árangri og við viljum halda því áfram. Við viljum einnig tryggja að samstarf við KSÍ verði gott.“

Almar segir að í upphafi hafi samband félagsins við KSÍ verið stirt. „Það var upplýsingavandi í upphafi og menn töluðu ekki nógu vel saman. En það er liðin tíð og við teljum að þetta sé í góðum farvegi.“

„Það er mikilvægt að menn séu samhentir. Við erum ekki komnir alla leið en við skynjum ekki annað en að það sé vilji til að taka þau málefni sem okkur varða lengra.“