Karabatic til Barcelona

Nikola Karabatic hefur gengið til liðs við Barcelona. Sá franski verður í herbúðum Börsunga næstu fjögur árin.

Barcelona beið lægri hlut í úrslitaleik Meistaradeildar Evrópu um helgina gegn Hamburg. Í stað þess að sleikja sárin hafa þeir styrkt stöðu sína með samningnum við Karabatic.

Leikstjórnandinn 29 ára hefur spilað með Montpellier undanfarin ár. Hann hefur unnið allt sem hægt er að vinna með franska landsliðinu sem hefur verið óstöðvandi undanfarin ár.

Mikið var fjallað um Karabatic í vetur þegar upp komst að leikmenn Montpellier og makar höfðu veðjað á úrslit í leikjum liðsins.