Karabatic tók þátt í að greiða upp eigin samning

Nikola Karabatic fékk sig lausan frá Montpellier með því að taka þátt í að greiða upp eigin samning.

Karabatic flæktist í veðmálahneyksli sem skók franskan handbolta fyrr í vetur og átti varla afturkvæmt í liðið vegna þess.

Hann er nú kominn til Aix-en-Provence og mun spila með liðinu til loka tímabilsins. Bróðir hans, Luka Karabatic, fór sjálfur frá Montpellier til sama liðs fyrr á tímabilinu.

Forráðamenn Montpellier greindu frá því að félagið fengi 86 milljónir vegna uppgreiðslu samningsins. Félagið fengi helminginn strax og hinn helminginn í lok tímabilsins.

Ekki er greint frá því hversu mikinn hluta Karabatic tekur á sig í þessum greiðslum.