Neitar að þreyta hafi valdið uppköstunum

Atli Sigurjónsson, leikmaður KR, kastaði upp í viðureign liðsins gegn ÍBV á Hásteinsvelli í gær. Atli staðfestir þetta í samtali við Fótbolta.net.

Atli segir að uppköstin hafi staðið yfir í tvær mínútur. Liðsfélagar hans hafi ekki áttað sig á vandamálinu heldur öskrað á hann að hætta þessu labbi. Áhorfendur hafi hins vegar séð hvað var um að vera og þjálfari og leikmenn á varamannabekknum áttað sig á málinu í kjölfarið.

Atvikið átti sér stað á 70. mínútu og átta mínútum síðar var Atla skipt af velli. Hann telur uppköstin megi rekja til matar sem hann neytti fyrir leik eða orkuleysis sökum matarskorts.

„Ég neita að trúa því að ég æli af þreytu eftir 70 mínútur,“ segir Atli við Fótbolta.net.

KR-ingar unnu 2-0 sigur og að leik loknum héldu leikmenn KR í grillveislu til foreldra Andra Ólafssonar, Eyjamannsins í KR. Atli segist hafa lagast í maganum í kjölfarið og þakkar foreldrum Andra kærlega fyrir sig.