Þetta er hið versta mál

Fylkismaðurinn Pablo Punyed braut bein í fæti í gær og verður frá keppni næstu átta vikurnar hið minnsta.

Punyed fór snemma af velli í 2-2 jafntefli gegn Keflavík í gær en þetta kom í ljós eftir leikinn. Ásmundur Arnarsson, þjálfari Fylkis, sagði þetta mikið áfall fyrir sitt lið.

„Hann er búinn að vera mjög öflugur fyrir okkur og þetta er því hið versta mál,“ sagði Ásmundur í samtali við Vísi í dag.

„Þetta er algengt brot, hið svokallaða fimmta „metatarsal-bein“ sem er oft sagt koma vegna álags. Hann lenti í þessu fyrir 2-3 árum síðan og þurfti þá að fara í aðgerð. Ég veit því ekki hvernig þetta mun enda núna.“

Ásmundur segir þó enga ástæðu til að gefast upp. „Við erum með fleiri leikmenn og hóp sem við treystum fyllilega.“