Umfjöllun, viðtöl og einkunnir: ÍA - Fram 2-0

Skagamenn fengu sín fyrstu stig í sumar með sigri á Fram, 2-0, í fjórðu umferð Pepsi-deildar karla í kvöld. Páll Gísli Jónsson, markmaður íA, átti stórleik í fyrri hálfleik og bjargaði Skagamönnum oft fyrir horn.

 

Vindurinn gerði mönnum erfitt fyrir á Akranesvelli í kvöld. Safamýrapiltar léku með vindi í fyrri hálfleik og var einstefna að marki Skagamanna. Framarar nýttu færin sín illa og Páll varði vel í markinu.

 

Þeir gulklæddu komu öllum á óvart og skoruðu fyrsta mark leiksins á 45. mínútu. Þá Skoraði Joakim Wrele  eftir sendingu frá Theodore Eugene Furness. Furness átti góðan sprett upp hægri vænginn og sendi boltann inn í teig þar sem Wrele skorar.

 

Skagamenn fóru því með eins marks forystu inn í leikhlé. Í seinni hálfleik léku heimamenn með vindi og  var allt annar bragur  á leik þeirra. ÍA var ekki lengi að skora á 49. mínútu skorar Hallur Flosason fínt mark eftir sendingu frá Maksims Rafalskis. Klaufaleg hreinsun hjá Fram sem Rafalskis nýtti sér. En Hallur kom nýr inn í liðið fyrir þennan leik.

 

Eftir seinna markið var sigurinn aldrei í hættu. Skagamenn eru komnir á blað í Pepsi-deildinni sem er mikið ánægjuefni fyrir þennan mikla knattspyrnubæ.

 

Þórður: Palli var öruggur í markinu

 

Þórður Þórðarson, þjálfari Skagamanna, var að vonum glaður eftir að þungu hlassi af þeim var létt.

„Það lá aðeins á okkur á nokkra mínútna kafla í fyrri hálfleik. Þetta var allt skot langt utan af velli sem Palli tók. Hann var öruggur í flestum sínu aðgerðum,“  Sagði Þórður og bætti við:

 

„Eftir að við náðum inn öðru markinu var þetta aldrei í hættu.

 

„Við erum búnir að spila þrjá erfiða leiki og hver leikur er mikil barátta. Næsti leikur er á sunnudaginn á móti FH og við erum ekkert að horfa lengra en það í bili,“ sagði Þórður að lokum.

 

Jóhannes: Karakter í þessum hóp

 

„Náðum að loka á þá í fyrri hálfleik og héldum hreinu. Svo kemur markið okkar á besta tíma eftir ágætis fyrirgjöf. Markið gaf okkur ótrúlegt sjálfstraust,“ sagði miðjumaðurinn Jóhannes Karl Guðjónsson í ÍA eftir leikinn.

 

„Framarar voru ekkert hættulegir í seinni hálfleik og eftir seinna markið hjá okkur fór allt loft úr þeim og við sigldum þessum stigum heim. En Framarar reyndu, þeir gáfust ekkert upp,“

 

„Búið að vera erfið byrjun hjá okkur og sjálfstraustið ekkert í botni en baráttan var til staðar og karakter í hópnum hérna í kvöld sem ætlaði sér þrjú stig,“ sagði Jóhannes Karl að lokum.

 

Þorvaldur: Maður fær ekki alltaf svona góð færi í úrvalsdeild

 

Fyrstu viðbrögð Þorvalds Örlygssonar, þjálfara Fram eftir leikinn.

 

„Fyrst og fremst svekkjandi,“ sagði Þorvaldur og bætti við, „Ég held að hvar sem við horfum á fyrri hálfleik að þá vorum við sterkari. En við klárum ekki færin, maður fær ekki alltaf svona góð færi í úrvalsdeild. Ekki eitt færi heldur þrjú eða fjögur og að fá þetta mark á okkur á loka sekúndunum er afar svekkjandi,“

 

„Ekki skánaði það í upphafi seinni hálfleiks þar sem við fáum mark á okkur strax. En ég var með þá tilfinningu að ef við myndum setja mark á þá fljótlega að þá myndum  við vinna leikinn. Það voru það miklir möguleikar að sækja á þá“ sagði Þorvaldur.

 

Sér Þorvaldur þá margt jákvætt í spili sinna manna hérna í kvöld ?

 

„Nei, eins og ég segi þá fellur ekki allt með manni og mörk breyta leikjum. En við vorum að skapa okkur góð færi hérna í kvöld. Þó vorum við að gefa klaufaleg mörk á okkur annan leikinn í röð,“ sagði norðlenski þjálfarinn að lokum.